ഒരിടത്തൊരിടത്തൊരിടത്ത്… അങ്ങ് ദൂരെ, കരിമണ്ണൂർ എന്നുപേരുള്ള നാട്ടിൽ, ഒരു പാവം കുട്ടിയുണ്ടായിരുന്നു. പാവമെന്ന് വെച്ചാ പഞ്ചപാവം. ഒരിക്കൽ, LKG ക്ലാസ്സിലെ drawing പരീക്ഷയ്ക്ക് കളറിങ്ങ് ചെയ്യാൻ അവനൊരു കോഴിപ്പൂവന്റെ പടം കിട്ടി. Camel-ന്റെ 12 കളറുള്ള ക്രയോൺസ് പെട്ടിയിലെ 12 കളറുമെടുത്ത് അവൻ ആ കോഴിക്ക് നിറം പകർന്നു. പച്ച, മഞ്ഞ, നീല, ചുവപ്പ്… അങ്ങനെയങ്ങനെ…

ഇടയ്ക്കെപ്പോഴോ ഒന്നു തലവെട്ടിച്ചു നോക്കിയപ്പോ, തൊട്ടടുത്തിരിക്കുന്ന കുട്ടി അതാ വെറും കാപ്പിപ്പൊടി നിറം മാത്രമെടുത്ത് കോഴിക്ക് കളറുചെയ്യുന്നു. Silly girl!

ഉത്തരക്കടലാസിൽ സ്റ്റാറും V.Good-ഉം നോക്കിയിരുന്ന അവനോട് ടീച്ചർ ചോദിച്ചു :-

“ഇതെന്നാ കോഴിയാടാ? നിന്റെ വീട്ടിലെ കോഴിക്കൊക്കെ ഈ നിറമാണോ?”

ചുറ്റുമിരുന്ന് ചിരിച്ചവരുടെ മുന്നിൽ തലകുനിക്കാതെ അവൻ പറഞ്ഞു :-

“അത് എന്റെ കോഴിയാകുന്നു.

അതിൽ പച്ചയുണ്ട്, മഞ്ഞയുണ്ട്, നീലയുണ്ട്, ചുവപ്പുണ്ട്…

അത് എന്റെ കൊഴിയാകുന്നു.”

അതെ. ഞാനാണ് ആ കുട്ടി. പേര്… ജെബിൻ.